News

10 дугаар сарын 7-ны өдөр 11-р ангийн Хими, Биологийн сонгон судлах ангийн сурагчид "Монос" дадлага хичээлд хамрагдлаа. Уг дадлага хичээлээрээ:

- Монос хүнс

- Монос лаборатори

- Монос эмийн үйлдвэрийн үндсэн үйл ажиллагаа, эрүүл ахуйн шаардлага зэргийг мэдэж авсан тухай сэтгэгдлээ үлдээжээ. Та бүхэн сурагчдын сэтгэгдэлтэй QR уншуулж танилцаарай.

Мөн энэхүү дадлага хичээлийг зохион байгуулах боломжоор хангасан Хобби сургуулийн 2005 оны төгсөгч, Монос группийн гүйцэтгэх захирал Х.Ананддаа баярлалаа

Тайлан бэлтгэсэн: 11-р ангийн хими, биологийн сонгон судлах ангийн сурагчид

10 дугаар сарын 3-ны өдөр Нийслэлийн Онцгой Байдлын Газарын дэргэдэх Нийслэлийн Иргэдийг Гамшгаас Хамгаалах Сургалт Арга Зүйн төвд 10-р ангийн 3 бүлгийн нийт 71 суралцагч гамшгаас хамгаалах бэлэн байдлын сургалтад суулаа.

Манай сурагчид 2 багт хуваагдан гал түймрийн аюулаас урьдчилан сэргийлэх, газар хөдлөлтийн үед өөрийгөө болон бусдыг аврах, хорт утаа гэсэн 3 өртөөгөөр дадлага сургуулилтад амжилттай хамрагдлаа.

Монголын багш нарын 58 дахь, дэлхийн багш нарын 30 дахь баярыг тохиолдуулан “Хобби” сургуулийн сурагчид маань нэг өдөр багш нарыгаа орлож, багш нар хүүхдүүдийнхээ төлөө гаргадаг их хөдөлмөрийг бага ч гэсэн ойлгохын тулд уламжлалт “Сурагчийн Нэг Өдөр” арга хэмжээгээ амжилттай зохион байгууллаа.

Энэ жилийн “Сурагчийн Нэг Өдөр” хөтөлбөрийн нээлтээр 1-р ангийнхан маань “Шинэ Өглөө” дууг өргөж, сурагчид сугалаа сугалан 5-н азтай багшийг шагнаж, 10a Тэнүүн болон 5-р ангийнхан “Багшаа дуулья” дууг эгшиглүүлж баяртайгаар эхлүүлсэн. Манай ахлах ангийн сурагчид анги дааж, дүү нартаа хичээл орж байхад, багш нар маань өөрсдийн бага нас руугаа аялж сурагчдын заах хичээлүүдэд суусан билээ. Энэхүү өдрөөр сурагчид маань их зүйл сурахаас гадна, багш сурагчдын харилцаа болон ахлах ангийн ах эгч нар дүү нартайгаа илүү дотносож өндөрлөлөө.